John 16

Azhin Nna Gmadayi Lo Nnabye

1“Mi gna fye aɓeye vinya, nabai to fya ku jeje fi nna ɓo nɓa ɓe lo nabye nyim. 2Ɓa ɓo nya fye ya nu aduwa-nyakun. Har esa ɓe lo aza ɓa wu fye, ɓai gye ngye ɓa zhin Shekwoyi ɓe ye nu. 3Ɓa ɓo zhin nu, ntu ge ɓa ta kpe Dada ye lo kwo omi m. 4Mi pma fye aɓeye gna nu, nabai ge esa nɓa ɓe ncei, fya pa ge nɓo ku pma fye gna. Mi to ɓo shir fye gnam, ntu ge mi ɓei ye kunsun n fyei.

5“Nsayi mi lo oza aba nu nwa tnu mi nyi, Ozahoi ta shan mi nya lo ge, ‘Ho lo nana?’ 6Ntu ge fye zhi nbugba wun yi nu, shi ma gna fye ɓeye. 7Ama ma gna fye gaiciya, kwo gna bmiya lo nfye aba ma lo, nmi to lo n Bmazhinyi ta ɓe fye abam; ama nma lo nɓa tnu nwoi wa ɓe fye aba.

8“Esa nwa ɓe, wo ɓa wu anyi ɓa laifi pei-pei, wo ɓa wu ɓa Shekwoyi ɓefyece, nwo wada yi. 9Anyi laifi nu nyi, ntu ge ɓa to ga mi gaiciyam. 10N ɓefyece ɓo, ntu ge mi lo Dada ba nu to fya je mi wyegye m. 11N wada ɓo, ntu ge aku owa pma anyi-su da, wato Shetan.

12“Aɓeda lo nmwa nmi ye ma gna fye, ama fye ta kpe ɓa ye nsayi yem. 13Esa nu Zafun Gaiciya nya ɓa ɓe, wo ɓa dna fye n zokwo gaiciya nya. Wo ta gna fye owohin ɓeda nu m. Ama nya nu nwo ku wo. Wo ɓo gna fye aɓo nɓa ɓe lo nabye. 14Wo ɓa la mi tu, wa wu fye omi mwa-mwa. 15Omi Dada mwa-mwa zhin omi nya nu; Ce na zhin mi-i gna fye ge, esa Zafun ɓa ɓe ncei wo ɓa wu fye omi mwa-mwa. 16Esa fyewyi fye ta je mi wyegyem, ama esa fyewyi njesun fye bagye mi wye.”

17Owo abara ho ɓanya ge, “Wo da kniɓei nu ge, esa fyewyi fye ta je mi wyegyen, esa fyewyi fye ɓa je mi wyegye n jesun; Woi je da ge, ‘ntu ge mi lo Dada aba’?” 18Ɓai nyaɓo, “Wo da kniɓei nu ge esa fyewyi a? Yi ta kpe ɓe ye lo nwo dam.”

19Yesu wa ku kpe ge, ɓa ye ɓa nya wo ɓo nu. Wa she sasa, wa nya ɓa ge, fye nya aje ɓo ntu ɓeda ɓo nu nma da nyi? 20Ma gna fye gaiciya, fye ɓa cibwi fyei zhin bugba zhi-zhiyi, ama anyi ɓa dagma. Fye ɓa wun bugba, ama Ofye bugba wun ɓa ze fye agmada. 21Kwo ɓo ze ngye shi nyikwoza ɓo yashi woi wo nyasan, ntu ge owo sa la si, ama esa wo zo ɓi ma, wa san-san ze amwi ntu agma da ɓo, ntu ge ala oza ma dna anyi. 22Bugba wun fye lo nsayi ye. Ama esa nmi ɓa jeze ɓe nyi, fye ɓo nya agmada, zaho to lo nwo ɓo gwo fye agmadahim. 23Nsahi fye to ɓo nya mi nyaho ɓo m. Gama enya nfya nya Dada kwo ɓo cewo, wo ɓo ga fye, nfya nya wo ɓo dna nmi ʼye wo ta wo fye ɓim. 24Fye to shin nyaho wyegyi dna nmi eye m. Fye gyiwye, wo ɓa ga fye ntu ge, Ofye agmada ɓa nu har ɓai gyiya.

25“Mi ku ɓeda da n nanyi-ɓesisi yi, ama esa ɓe lo nmi ta je da lo nu m, sai dai ma gna fye Dada ɓo pei-pei. 26Dna n nyipyeyi-hi fye ɓo gyiwye dna nmiʼye. Mi ta da ge mi ɓei gyi Dada wye ntu fye ɓo nu m. 27Ntu ge Dada ye fye lo, gama fye ku gaiciya ga mi ge ma gmi n Dada aba nu. 28Ma gmi n Dada aba nu, mi-i ɓe anyi, mɓa fa anyi, ma jeze lo Dada aba.”

29Owo abara ɓa gna wo ge, “Ho ku ɓo da nsayi cewo to ge n nanyi-ɓesisi yim. 30Yi kpe lo ge ho kpe aɓo ye lo vinya, Zaho to lo nwo ɓa wu ho ɓohom, ntu deye ɓo, kwo ku zhin yi ku gaiciya ga ge ha gmi n Dada aba nu.”

31Yesu wa nya ɓa ge, “Fye ku gaiciya ga nhayi!” 32“Ama esa ɓelo, kwoi la lu ɓe, nfye ɓa gnamiya zaho-zahoi wa lo wo puwa, fya ce mi gni nmi gmanyi yi, ama mi to gni nmi gmanyi yi nnum, gama Dada kunsun lo nmi-i. 33Ma gna fye deye, ntu ge fya bwa bugbafu nu. Fye ɓa bwa wahala dna nanyi ye. Ama agu-tu-fye ngye apma, Miku nasara zhin n nanyi yi.”